Корей мәдени орталығы 11 наурыз күні Алматы қаласындағы Халықаралық бизнес университетінде (UIB) «Korean–Kazakh Culture Fusion Contest» іс-шарасын өткізді.

Іс-шара UIB университетімен және университет жанындағы «Koreana» корей мәдени клубымен бірлесіп ұйымдастырылды. Байқауға Алматы қаласындағы түрлі жоғары оқу орындарының студенттік командалары қатысып, корей және қазақ мәдениетінің элементтерін үйлестірген шығармашылық өнерлерін ұсынды.

Қонақтар үшін арнайы интерактивті аймақтар ұйымдастырылды. Онда корейдің дәстүрлі киімі — ханбокты, сондай-ақ қазақтың дәстүрлі бас киімдері — сәукеле мен бөрікті киіп көріп, фотозонада естелік суретке түсуге мүмкіндік болды. Сонымен қатар арт-аймақта қазақы ұлттық стильде безендірілген карточкаларға өз есімдерін корей тілінде жазып көруге мүмкіндік жасалды. Бұл шаралар үлкен қызығушылық тудырып, көптеген қатысушыларды тартты.

Қатысушылар өлең оқу, театрландырылған қойылымдар, би, ән айту және аспаздық өнер сияқты түрлі шығармашылық жанрлар бойынша өнер көрсетті. Іс-шара Қазақстан жастарына корей мәдениетімен жақынырақ танысуға мүмкіндік беріп, екі ел арасындағы мәдени алмасудың жарқын үлгісіне айналды.